Komentarista gipusil, kritikal

ILIGAN City - Talandugon ang kahimtang sa usa ka komentarista sa radyo human gipusil sa wala mailang lalaki kagahapon sa buntag duol sa usa ka tunghaan ning siyudad.

Ang biktima mao si Jose "Joe" Pantoja, hingkod ang panuigon ug blocktime commentator sa dxLS "Love Radio" FM.

Ang inisyal nga imbestigasiyon sa kapolisan nagbutyag nga nahitabo ang pagpamusil nga alas 7:10 sa buntag.

Sa wala pa ang pagpamusil gikan naghatod sa iyang anak sa tunghaan ang biktima sakay sa iyang motorsiklo. Sa pagbalik ni Pantoja nihunong kini sa usa ka copying center duol sa Mindanao State University-Iligan Institute of Technology (MSU-IIT) sa Tibanga highway aron magpakopya og mga dokumento.

Usa ka armadong lalaki nga naka-bonnet ang niduol sa biktima og nipusil kaniya makatulo ka higayon gamit ang kalibre .45.
Samad sa tuong kilid ug sa tiyan nga bahin ang naangkon sa biktima.

Dali nga nisibat ang suspetsado ug nisakay sa naghulat nga motorsiklo nga gimaneho sa laing naka-bonnet nga lalaki.
Samtang dali usab nga gidala sa Mindanao Sanitarium and Hospital mga 200 metros lang gikan sa nahitaboan ug anaa kini sa kritikal nga kahimtang sulod sa intensive care unit.

Dili pa matino ang motibo sa maong pagpamusil apan dako ang posiblidad nga may kalambigitan kini sa iyang trabaho human kini nakadawat og ubay-ubay na ka mga hulga pinaagi sa text messages.

Gilauman ni Mayor Lawrence Cruz ug sa mga kadagkuan ning dakbayan nga mahatagan og daling kasulbaran ang maong hitabo tungod kay adunay naka-instalar nga surviellance camera didto sa nasangpit nga lugar nga posibling maoy makahatag og giya kung kinsa ang responsabli sa maong hitabo.

Samtang gimando sa hepe sa Police Regional Office (PRO) 10 nga hatagan og igong seguridad ang sakop sa prensa nga giluthang sa dakbayan sa Iligan samtang nagpabilin kini sa tambalanan.
Lakip sa gimando ni Chief Supt. Teodorico Capuyan, Police Regional Director sa PRO-10 ang hugot nga imbestigasyon sa maong hitabo.

Subay niini gipaguwardiyahan na sa mga polis ang tambalanan diin gidala si Pantoja aron maseguro nga dili kini tiwasan sa mga suspetsado.

Dili pa lang dugay gibutyag ni Capuyan nga usa sa gihingusgan sa bag-ong PNP Director mao ang dali nga pagsulbad sa extra judicial killings nga nahitabo partikular na sa mga sakop sa prensa nga nangabiktima.(Sunstar)